26 января 2018 г.
Район администрацийĕн ларусем ирттерекен залĕнче районта чрезвычайлă лару-тăруран тата пушар хăрушсăрлăхĕнчен асăрханас тĕлĕшпе тимлекен комиссин анлă ларăвĕ иртнĕ.
Унăн ĕçне район администрацийĕн пуçлăхĕ -районти гражданла хỹтĕлев ертỹçи Рудольф Селиванов, Чăваш Енти чрезвычайлă лару-тăру патшалăх комитечĕн "Чувашская республиканская противопожарная служба" хысна учрежденийĕн начальникĕ Валерий Игнатьев, муниципаллă вĕрентỹ учрежденийĕсенче чрезвычайлă лару-тăру тата пушар хăрушсăрлăх ыйтăвĕпе ĕçлекен комисси членĕсем, ял тăрăхĕсен пуçлăхĕсем, район администрацийĕн пай тата сектор начальникĕсем, гражданла хỹтĕлевĕн штатлă мар формированисен ертỹçисем, çак енĕпе учреждени-предприятире ĕçлекен уполномоченнăйсем хутшăннă.
Ларура районта 2017 çулта гражданла хỹтĕлев тата чрезвычайлă лару-тăруран асăрханас тĕллевпе мĕнле ĕçленине пăхса тухнă, 2018 çулхи тĕллевсене палăртнă. Тĕп докладпа район администрацийĕн ятарлă программăсен сектор заведующийĕ Григорий Каллин тухса калаçнă. Комиссин иртнĕ çулхи ĕçне пĕтĕмлетнĕ май, вăл халăха хăрушсăрлăхпа тивĕçтерес тĕлĕшпе сахал мар ĕç тунине палăртнă, кăçалхи тĕллевĕсем пирки чарăнса тăнă.
Çавăн пекех районти пушар надзорĕн начальникĕ Андрей Тукмаков тата РФ ШĔМĕн районсем хушшинчи "Батыревский" уйрăмĕн начальникĕ Андрей Фомин асăннă службăсен иртнĕ çулхи ĕç итогĕпе паллаштарнă, кăçалхи тĕллевсене çивĕчлетнĕ. Кунтах Сăкăт тата Шăнкăртам ял тăрăхĕсен пуçлăхĕсем Л. Черновпа М. Валитов вырăнсенче чрезвычайлă лару-тăруран асăрханас тĕллевпе пурнăçласа пыракан ĕçсем пирки каласа панă.
- Общество хăрушсăрлăхĕ районти аварипе çăлав служби мĕнле ĕçленинчен çеç килмест. Пирĕн тĕп тĕллев чăн малтан чрезвычайлă лару-тăрăва çакланнă кашни гражданина хăйне мĕнле тытмаллине ăнлантарасси, халăх хушшинче хăрушсăрлăх культурине хăнăхтарасси. Ахальтен мар ĕнтĕ Раççей МЧСĕ 2018 çула Хăрушсăрлăх культурин çулталăкĕ тесе ят пачĕ,_ палăртнă район администрацийĕн пуçлăхĕ Р. Селиванов комисси ĕçне пĕтĕмлетнĕ май.
Юлашкинчен вырăнсенче гражданла хỹтĕлев ĕçне тата чрезвычайлă лару-тăрăва пĕтерес, пушар хăрушлăхне парăнтарас ĕçе ăнăçлă йĕркеленĕ Сăкăт ял тăрăхне, уйрăм хастарсенчен Шăнкăртамри М. Шршапа Ф. Чабатова район администрацийĕн Хисеп грамотипе Тав çырăвĕсене, Ишлĕ ял тăрăхĕнчи ирĕклĕ пушар дружинин членĕсене - Петр, Михаил тата Вячеслав Красновсене республикăри ГК ЧСĕн Тав çырăвне парса чыс тунă.
А. НИКОЛАЕВА
Источник: "Авангард" (газета Батыревского района)