24 апреля 2018 г.
Пирĕн районта кăçал пушарсен хисепĕ иртнĕ çулхинчен ÿснĕ, пиллĕке çитнĕ. Пĕлтĕр вара икĕ пушар пулнă ку вăхăт тĕлне. Çакă, паллах, республикăна та пăшăрхантармасăр тăма пултараймасть. Çавăнпа Тăвайне республикăн тĕп хулинчен Раççей МЧСĕн республикăри Тĕп управленийĕн ертÿçин çумĕ - надзор тата профилактика ĕçĕсен пайĕн начальникĕ Николай Валерьевич Петров килнĕ. Раççей МЧСĕн районти пушар хуралĕн, пушар чаçĕн ĕçĕ-хĕлĕпе, инкексен сăлтавĕсемпе, документсемпе, пушарниксем вут-çулăма сÿнтерме хатĕр пулнипе тĕплĕн паллашнă, ертÿçисемпе тĕл пулса сÿтсе явнă, лару-тăрăва пĕрле тишкернĕ.
Элпуçне çитсе унти муниципаллă пушар хуралĕн ĕçĕ-хĕлĕпе те вырăнта паллашнă. Кăçал Эль енчи ялсенче икĕ пушар тухнă, Çĕнçырмаринче пĕр çын пурнăçĕ татăлнă. Кунти пушар машини юсавлă, анчах водителĕ пĕрре çеç. Шыв резервуарĕсене тĕрĕсленĕ тата ыт.те. Яваплă çынсемпе тĕл пулса калаçнă.
Пур çĕрте те профилактика ĕçне тĕплĕн тишкернĕ.
Источник: "Ял ĕçченĕ"